Jazasyn óteýshiler sany azaıǵan

Oǵan Prezıdenttiń kómekshisi – Qaýipsizdik Keńesiniń hatshysy, Ishki ister, Densaýlyq saqtaý, Din isteri jáne azamattyq qoǵam, Aqparat jáne kommýnıkasııalar mınıstrleri, sondaı-aq múddeli memlekettik organdar men ákimdikterdiń ókilderi qatysty.

Memleket basshysynyń tapsyrmalaryn oryndaý aıasynda Bas Prokýror qylmystyq prosesti izgi­lendirý men repressıvtiligin azaıtý maqsatynda keshendi shara­lardyń qabyldanǵanyn atap ótti. 

Sonyń nátıjesinde táýelsizdik jyldarynda halyqaralyq túrme ındeksi boıynsha Qazaqstan 3-ten 73-shi orynǵa kóterilgen. Eldegi jazasyn óteýshilerdiń sany 100 myńnan 35 myńǵa azaıyp, 8 kolonııa jabylǵan. 

Al Qaýipsizdik Keńesiniń hat­shysy Nurlan Ermekbaev penı­ten­sıarlyq júıedegi oryn alǵan kemshilikterge jáne onda naqty reformalardyń júrgizilýi qajet ekenine nazar aýdardy.

Júrgizilgen taldaý boıynsha ótken jyldary sottalǵandar arasynda jasalatyn qylmys 44 paıyzǵa artqan. Jabyq mekemelerdegi jazasyn óteýshiler arasynda ózara qaqtyǵystar, rejimdi qasaqana buzý jáne denege zaqym keltirý qylmystary jıi oryn alǵan. 

Sottalýshylardyń ara­syn­daǵy ólim jaǵdaılarynyń ósýi baıqalǵan. Sondaı-aq búginde túzeý mekemelerinde múm­kindigi shekteýli 756 adam, isik aýrýyna shaldyqqan 25 adam jáne ózdiginen júrip-tura almaıtyn 4 adam qamaýda otyr.

Osyǵan oraı, Bas Prokýror Ishki ister jáne Densaýlyq saq­taý mınıstrlikterine bas bos­tan­dyǵynan aıyrý oryndarynan merzimderinen buryn bosatý úshin aýrýlar tizimin qaıta qaraýdy tapsyrdy.

Eńbek jáne áleýmettik qor­ǵaý mınıstrine shamamen 800 sot­­talǵan-múgedek memlekettik qol­­daýmen qamtamasyz etý usy­nyl­dy. Sonymen qatar qamaý oryn­­darynan bosatylǵan adam­dar­­dy eńbekpen tolyqqandy qam­­tý tetigin ázirleý qajettiligi aıtyldy.

Prokýrorlyq tekserýler nátı­jesinde sottalǵandardy eńbekpen qamtý jáne materıaldyq-teh­nıkalyq qoldaýyn kórsetýge tartylǵan «Eńbek» mekemesiniń qyzmetinde memlekettik satyp alý týraly zańdylyqtyń júıeli túrde buzylýy, laýazymdy asyra paıdalaný, bıýdjet qarjysyn jymqyrý anyqtaldy.

Sońǵy 3 jylda sybaılas jem­qorlyq qylmystaryn jasa­ǵany úshin kásiporynnyń Aqtóbe, Shyǵys Qazaqstan jáne Batys Qa­zaq­stan oblystaryndaǵy fılıal­darynyń 5 basshysy sottaldy.

Bas Prokýror jaýapty laýazymdy tulǵalardyń baıandamalary men esepterin talqylaý qorytyndysy boıynsha jazalardy oryndaý júıesin jetildirý qajettiligin atap ótti.